مجزرة بورسعيد كادت أن تتكرر مع النجمة


في حادثة كتير خطيرة صارت مساء الاحد ببحمدون. أكيد في ناس حكيو عنها وعلقوا على الموضوع وعبرو عن موقفن ومعظم الشباب من جمهور ومحبي النجمة.
انا كمان مشجع لنادي النجمة، بكون كذاب وناكر للجميل اذا ما بقول انو انا وعيت على الفوتبول لما كنت احضر النجمة مع الوالد يللي كان ياخدني على بيروت وننطر يجو على طرابلس.
كتير من الموجودين هون بالغروب اكيد مرّو بمرحلة من حياتن تابعوا فيها الدوري اللبناني “اكيد قبل 2005”
كتير منكن حبّو النجمة والانصار وحبو الفوتبول من ورا هالفريقين.
انا وعيت على الدنية كان في فريق لقبوا الفريق النبيذي كان يلعب فيه رائد ابو النصر محمد ابو عليوة جمال الحاج عباس شحرور و من قبلن الكوري وعساف خليفة
ومن بعدن موسى حجيج الجيل الحالي. القصة مش بالأسماء القصة بعشق لنادي كان يجمع لبنانيين اتعلموا يكونو مقسوفين بعد حرب ضلت 25 سنة قتلت كل صلة تواصل بين اللبنانيين. هيدا الحب ضل مكمل يللي بيشجع نادي مستحيل يقدر يشجع غيرو شو ما صار. تغيرت الظروف انفتحنا على العالم صرنا نقدر نحضر دوري اوروبي وبطولات عالمية صرنا نقدر نشجع الفريق يللي بدنا يا بس بضل عشق الفريق اللي عرفت الفوتبول من وراه مكمل معك.
يللي صار الاحد وصمة عار بحق كل لبناني وكل مشجع فوتبول. مهما كانت الظروف وشو ما كانت الاحوال، وبغض النظر كونك بتحب النجمة او بتكرها ما في انسان بيحب الفوتبول ممكن يقبل بالشي يللي صار . صحيح انو جمهور النجمة في بقلبوا عناصر مشاغبة، بس من ايمتى كان الانضباط صفة لمشجع كرة قدم؟ صحيح انو في جماهير ببتفوه بكلام بذيء وخارج عن الادبيات ولكن من ايمتى كان مشجع الفوتبول اذا بدو ينتقد لاعب او فريق خصم بيصرخ وبيقول “ليك ملا فركوح” هيدي كلها مش مبررات لجمهور النجمة ولا حتى مبررات بتبيح الشي اللي صار مسا الاحد.
الاعلام اللبناني حكي عن الموضوع ولكن بشكل جدا سفيه وقلل من اهميته. الصحف اللبنانية تجاهلت التفاصيل واكتفت بالعموميات والنقل عن صفحات الفيسبوك الكلام اللي صدر عن الفرق. تلفزيونيا ما في غير الال بي سي جابت الخبر ولكن بعد اكثر من 24 ساعة على حصوله علما انو ما قدمت اي جديد بالموضوع.
البرامج الرياضية على التلفزيون وكأن عندها خوف من قول الحقيقة فاكتفى الجديد باستقبال اتصالات من ادارات اندية متقاعسة واتصال بالمدير الفني للنجمة موسى حجيج اللي ماقدر يعبر بطريقة صحيحة لكثرة اسئلة حسن شرارة اللي افتقدت لأسلوب الحوار الحضاري ولما حاول كابتن نادي النجمة عباس عطوي يحكي، تعذر على القناة استكمال البرنامج بسبب ارتباطها بعرض المسلسل المدبلج.
علما انو المنار ايضا تقاعصت بالموضوع فلم تكلف نفسها التواصل الا مع رئيس نادي الاخاء و الحديث مع موسى حجيج ايضا اللي قدم استقالته على الهوا .
الخطأ الأكبر اللي وقع فيه التلفزيونين مش بس انو افتقروا لأساليب الحوار السليمة ولا طريقة التعاطي مع الموضوع بل عدم محاولة الاثنين التواصل مع المسؤول الأول والأخير عن الموضوع واللي هو الاتحاد اللبناني لكرة القدم اللي اكتفى باقرار 3 قرارات لا قيمة معنوية لها من الناحية الفنية. بحيث قرر:
1 – منع اقامة مباريات على أرض الأخاء في ملعب بحمدون البلدي الموسم المقبل “علما انو عائدات الاتحاد من اقامة المباريات على هذا الملعب شبه معدومة لأن جماهير الفرق رغم قلتها ما رح تجي على هيدا الملعب لبعد المسافة على معظمها ما عدى الصفاء” علما وانو لي ذكريات على هذا الملعب في ايام مضت.
2- اقامة مباراة الأنصار مع الآخاء الاسبوع المقبل دون جمهور.
3- تأجيل مباراة الصفاء والنجمة الى ما بعد مباريات المنتخب المقررة في أول حزيران المقبل و تأجيل نهائي الكأس. ” مع علم الاتحاد الذي تلقى رسالة من ادارة النجمة اللي صرحت بأن النادي لن يلعب المباراة امام الصفاء في حال لم يتخذ الاتحاد قرارات بحجم ما حصل نهار الأحد”
بذلك وكأن الاتحاد يضرب عرض الحائط رسالة وطلب النجمة. مثبتا النتيجة ومعلنا فوز الصفاء بالدوري وهيدا شي مش مهم أمام الفاجعة الكبيرة. الدوري مش قصة ولا خسارة النجمة للدوري قصة علما انو لاعبي النجمة قنعوا بالنتيجة بغض النظر عن كل الملابسات حول قرارات الاتحاد تجاه النجمة وجمهورها طوال الموسم.
القصة مش قصة لا دوري ولا ثلاث نقاط ولا فور . القصة قصة شرف نادي ولاعبين بالاضافة الى كارثة بحق الكرة اللبنانية كان ممكن ان تحصل مساء الأحد.
التعرض للاعبين والجهاز الفني والجمهور النجماوي الذي اصيب منه 7 مشجعين منهم من ضرب بأدوات حادة وكان بحاجة لعملية مستعجلة علما انو حياتو كانت بخطر.
بيرجعنا بالذاكرة لحادثة بعدها صورها ببالي .
اي انسان بيحب كرة القدم وبيشجع فريق عليه ان يستنكر ما حصل وان يرفع الصوت عاليا امام الاتحاد اللبناني المتقاعس من زمان عن اداء واجباتو لأخذ قرارات حازمة تجاه ما حصل.
واذا ما كان قادر ياخذ قرارات فليتفضل ويقدم استقالتو قبل ما يصير مجزرة بور سعيد تانية بلبنان.
الاتحاد اللي فشل بحل أمور أبسط من هيدي بكتير اليوم أثبت فشلوا مرة تانية بهكذا قرارات هجينة. مش رح قول انو النجمة مستهدف ولا انو الاتحاد متعاطف مع فريق على حساب آخر.
كل شي بدي قولوا انو عيب اليوم ما يكون عنا اتحاد، هو المسؤول عن اخفاقات المنتخب والقضاء على الفورة الجميلة اللي صارت بتصفيات كأس العالم، هو المسؤول الأول والوحيد عن ما حصل بالكرة اللبنانية من تراجع خلال السنين الماضية وهو المسؤول الأول والوحيد عن كل قطرة دم قد تسقط في الملاعب.
.فليتفضل بالرحيل وليأتي من يستحق أن يرفع مستوى الكرة اللبنانية

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s